当日回去，与阿金、阿珠等闲谈，讲起咸水妹的形景。阿金不甚深悉，惟阿珠到过广东，又在广东堂子里做过，会说广东的土白，所以上海的咸水妹他却认识几个，深晓得内中的底细。今闻宝玉说起，便接嘴道：“有两个咸水妹我倒认得格。我问歇俚笃，陪仔外国人困觉（读告）阿有点怕介？俚说刚（读姜）起头是有点怕格，而且外国人格身浪羊骚气得呒淘成笃。后来轧熟仔，倒也不过实梗味道，也闻惯哉。性度也摸着哉。有时做着外快生意，倒比做间搭格么二野鸡好得多笃！”宝玉道：“格种人想必外国话是才会说格？”阿珠道：“格是自然，俚笃也是从小学格。勿然末，外国人来白相才要带仔翻译通事，阿要讨厌煞嗄？”宝玉又问道：“俚笃格打扮啥落才是格副样式格介？”阿珠道：“外国人欢喜格种样式，勿欢喜倪格打扮格，倒说俚笃干净勒清忒相，想阿要气数佬！”宝玉道：“就叫麻油拌青菜，各人心爱。奴别样勿中意俚笃，就剩俚笃梳（读师）格前刘海，奴倒蛮中意格。”阿珠道：“中意末，只要拿前头格长头发梳点下来，有剪刀一剪，小木梳一梳，刨花水刷一刷光，就卷仔起来，搭俚笃一样哉。”阿金插嘴道：“倒实头在行（读杭）格，啥勿去做仔咸水妹嗄？”阿珠道：“别样呒啥，倒是陪外国人一淘困，我怕煞佬！”宝玉道：“奴以为怕是呒啥怕。外国也是人，中国也是人。不过，勿懂俚笃格闲话，倒真真难格。”